Tveimur karlmönnum, sem ákærðir voru fyrir líkamsárás á skemmtistað á Selfossi þann 16. október 2005 er ekki gert að sæta refsingu í málinu með hliðsjón af þeim drætti sem hefur orðið á málinu við rannsókn þess og þar til ákæra var gefin út, svo og að um hegningarauka er að ræða í báðum tilfellum. Þetta er niðurstaða Héraðsdóms Suðurlands frá því í morgun.

Í niðurstöðu dómsins kemur fram að ekki er ágreiningur um að ráðist hafi verið á manninn sem kærði tvímenningana fyrir líkamsárás tiltekið kvöld enda fái það stuðning í vottorði læknis og vitnisburði fólks á staðnum. Ákærðu neituðu hins vegar báðir sök og muna ekki eftir því hvort þeir voru á skemmtistaðnum umrætt kvöld, enda tvö og hálft ár síðan atburðir gerðust.

„Verða ákærðu því sakfelldir fyrir þá háttsemi eins og henni er lýst í ákæru og er hún réttilega færð til refsiákvæða. Við ákvörðun refsingar verður litið til þess óheyrilega dráttar sem hefur orðið á máli þessu frá því að kæra barst lögreglu og þar til ákæra var gefin út. Þá voru skýrslur ekki teknar af vitnum fyrr en rúmum tveimur árum eftir að brotið var kært. Engin haldbær skýring hefur fengist á þessum drætti,” að því er segir í niðurstöðu héraðsdóms.

Ákærðu er hins vegar gert að greiða allan sakarkostnað er hlotist hefur af máli þessu, rúmar sex hundruð þúsund krónur auk þess sem þeim er gert að greiða fórnarlambinu  387.345 krónur í skaðabætur.