Eigendur veitingastaðanna Ölstofunnar og Vegamóta, sem í síðustu viku fengu tilkynningu um umsögn heilbrigðiseftirlitsins um að ekki sé hægt að leyfa þeim að hafa opið lengur en til klukkan 3 að nóttu um helgar vegna hávaða fyrir utan veitingastaðina, hafa frest þar til í næstu viku til að gera athugasemdir.

„Við höfum haft samband við lögfræðing og sent lögreglu bréf um að málið verði endurskoðað,“ segir Kormákur Geirharðsson, formaður Félags kráareigenda og annar eiganda Ölstofunnar. Hann tekur það fram að þótt heimilt hafi verið að hafa opið til 5.30 hafi staðnum ýmist verið lokað klukkan 4.30 eða 5.

Óli Már Ólason, annar eigenda Vegamóta, segir eigendurna munu setjast yfir málið með lögfræðingum sínum. „Við ætlum að koma með ákveðnar tillögur um breytingar. Við viljum finna lausn á þessu í samvinnu við borgina og lögreglu,“ segir hann. Að sögn Óla Más hefur Vegamótum venjulega verið lokað klukkan 4.30 en stundum klukkan 4.

Heiða Gestsdóttir, lögfræðingur hjá lögreglustjóraembættinu á höfuðborgarsvæðinu, segir unnið eftir lögum um veitingastaði, gististaði og skemmtanahald sem tóku gildi um mitt síðasta ár. „Lögreglan er leyfisveitandi í Reykjavík en borgin ákveður afgreiðslutímann. Heilbrigðiseftirlitið vill stytta afgreiðslutímann og umsögn þess hefur verið kynnt eigendum. Þetta er bindandi umsögn þannig að í raun er lögreglustjóra ekki heimilt að veita lengri afgreiðslutíma.“