Árbæjarhverfi. mbl.is/Golli

Rannsókn á húsnæði Heilsugæslu Árbæjar í Reykjavík sýnir að ekki er orsakasamhengi milli veikindaeinkenna og ástands húsnæðisins. Heilsugæsla höfuðborgarsvæðisins hefur samt ákveðið að flytja heilsugæsluna í Árbæ í bráðabirgðahúsnæði að Höfðabakka 9. Áformað er að Heilsugæslan í Árbæ flytji í nýtt varanlegt húsnæði  1. desember.

Grunur lék á að samband kynni að vera á milli ákveðinna veikindaeinkenna starfsmanna og ástands húsnæðis stöðvarinnar. Sýni voru send til Svíþjóðar til ræktunar en niðurstaða rannsóknarinnar sýnir að ekki er orsakasamhengi milli veikindaeinkenna og ástands húsnæðisins. Rannsóknin hafði það hins vegar í för með sér, að loka hefur þurft tímabundið helmingi húsnæðis heilsugæslunnar.

Þá hefur Vinnueftirlitið bannað notkun vinnurýma þar sem eru rakaskemmdir og gert kröfur um úrbætur á húsnæðinu áður en það verður tekið í notkun aftur.

Það er mat Heilsugæslu höfuðborgarsvæðisins að ekki sé raunhæft að gera ráð fyrir áframhaldandi notkun húsnæðis Heilsugæslunnar í Árbæ. Óvissa sé um umfang nauðsynlegrar viðgerðar og endurbóta á húsnæðinu, sem og um hugsanlegan kostað við þær. Þá sé notkun húsnæðisins á meðan framkvæmdir standa yfir óraunhæf, sem þýði, að loka þyrfti stöðinni tímabundið á meðan þær standa yfir. Því hafi verið tekið á leigu bráðabirgðahúsnæði og hefst starfsemi Heilsugæslu Árbæjar þar á morgun.

Vegna flutnings starfseminnar á nýjan stað verður Heilsugæslan Árbæ lokuð á  morgun, fimmtudag, en skjólstæðingum Heilsugæslunnar í Árbæ er bent á Læknavaktina og neyðarþjónustu Landspítala ef nauðsyn krefur.