Helga Ólafs hjá Alþjóðahúsi telur veggmyndina hafa komið í veg fyrir veggjakrot. mbl.is/G. Rúnar

„Okkur brá heldur en ekki í brún þegar við mættum í vinnuna og sáum að það var verið að mála yfir listaverkið,“ segir Helga Ólafs, upplýsingafulltrúi Alþjóðahúss, en starfsmenn borgarinnar voru í óðaönn að mála yfir listaverk á bak við Alþjóðahúsið þegar starfsfólk mætti til vinnu á þriðjudagsmorgun.

Veggurinn sem um ræðir var málaður á Menningarnótt í fyrra og segir Helga hann alveg hafa fengið að vera í friði fyrir veggjakroti.

„Það er borin virðing fyrir svona listaverkum en áður var þessi veggur allur í kroti,“ segir Helga. Hún segir að leyfi hafi verið fengið hjá eiganda hússins áður en myndin var gerð og sagði eðlilegt að haft hefði verið samband áður en byrjað var að mála vegginn. „Það eru ekki mörg svona verk í bænum, þetta er bara spurning um eitt símtal. Þarna er greinilega um misskilning að ræða. Það er gott og gilt að uppræta veggjakrot en veggjalist er ekki hið sama og krot. Það þýðir ekki að álasa drengjunum sem máluðu yfir. Ef til vill fengu þeir ekki nægilega skýr skilboð. Veggjalist er endurnýjanleg og það er kannski spurning að auglýsa eftir áhugasömum gröffurum að taka að sér verkefnið,“ segir hún.

„Ef fólk hefur ekki sótt um leyfi til veggskreytinga eða myndskreytinga er málað yfir þær,“ segir Jakob Frímann Magnússon, framkvæmdastjóri miðborgarmála.

Hann segir allar myndskreytingar háðar leyfum frá byggingarfulltrúa. „Borgaryfirvöld eru í þessu verkefni að hreinsa og fjarlægja allt sem ekki hefur verið veitt sérstakt leyfi fyrir,“ segir hann.

Hann segir það undantekningu ef sótt hefur verið um leyfi fyrir veggskreytingum en bætir því jafnframt við að myndskreytingar geti verið æskilegar og nefnir verk á vegg hegningarhússins sem dæmi enda hafi hann fengið að vera óáreittur.