Bakkavík í Bolungarvík Bæjarins besta

Stjórn Bakkavíkur í Bolungarvík hefur ákveðið að ráðast í framkvæmdir við rækjuverksmiðju félagsins til að auka hagvæmni í vinnslunni. Einnig hyggjast þeir hefja vinnslu á vöktum sem, ásamt breytingum á verksmiðjunni, ætti að skila um 140% meiri afköstum í vinnslu en náð er nú.

Áætlað er að breytingarnar muni kosta um 208 milljónir króna en skrifað hefur verið undir samninga um kaup á tækjum og breytingar á verksmiðjunni. Áætluð framleiðslugeta rækjuverksmiðjunnar eftir breytingar verður 12.000 tonn á ári miðað við framleiðslu á tveimur vöktum, að því er segir í frétt á vef Bæjarins besta.

Til að ráðast í framkvæmdirnar hefur fjármagn verið tryggt frá Byggðastofnun ásamt því að stefnt er að því að auka hlutafé félagsins um 40 milljónir. Þetta kemur fram í bréfi stjórnar Bakkavíkur til hluthafa þar sem þeim er boðið að taka þátt í hlutafjáraukningunni.

Í bréfinu kemur einnig fram að afkoma vinnslunnar hafi verið slæm upp á síðkastið og mat stjórnar Bakkavíkur sé að eina leiðin til að halda áfram rekstri félagsins sé að auka hagkvæmni vinnslunnar, en mun hærra hráefnisverð er á Íslandi ef miðað er við keppinauta í Kanada og á Grænlandi.