Norrænu forsætisráðherrarnir hittust síðast í Norður-Svíþjóð í vor. norden.org/Johannes Jansson

Forsætisráherrar Norðurlanda hittast á óformlegum fundi dagana 15.-16. júní við Göta-skurðinn í Svíþjóð. Fredrik Reinfeldt forsætisráðherra Svíþjóðar, Anders Fogh Rasmussen forsætisráðherra Danmerkur, Matti Vanhanen forsætisráðherra Finnlands, Jens Stoltenberg frá Noregi og Geir H. Haarde forsætisráðherra sitja allir fundinn.

Forsætisráðherrarnir hittast árlega á óformlegum fundi til að ræða norræn málefni, alþjóðamál og Evrópumál. Þar sem Svíar fara með formennsku í Norrænu ráðherranefndinni á þessu ári, er Fredrik Rheinfeldt forsætisráðherra gestgjafi fundarins í Svíþjóð.

Á fundinum verða óformlegar umræður um norræn málefni sem efst eru á baugi og norrænt samstarf. Meðal annars verður rætt um Eystrasaltssamstarfið, viðbrögð við alþjóðlegu hættuástandi og hnattvæðingu. Forsætisráðherrarnir munu halda áfram umræðum um loftslagsvandann og samkeppnisstöðu Norðurlanda sem hófust á hnattvæðingarráðstefnunni í Riksgränsan í apríl síðastliðnum.