Maðurinn var nálægt Hvalfjarðargöngum þegar lögreglan á Akranesi veitti honum eftirtekt. Mbl/Rax

Lögreglan á Akranesi segir að maður sem reyndi að komast undan lögreglunni í dag hafi ekið á 180 kílómetra hraða í átt til bæjarins. Grunur leikur á að maðurinn hafi kastað fíkniefnum út um glugga bílsins. Þá er hann grunaður um akstur undir áhrifum fíkniefna. 

Það var um klukkan 13 í dag sem lögreglan á Akranesi ákvað að stöðva bíl sem ekið var í grennd við Hvalfjarðargöngin í átt til Reykjavíkur. Tilgangurinn var að kanna ástand ökumanns. 

Þegar ökumaðurinn varð lögreglunnar var sneri hann bíl sínum við  og ók í átt til Akraness á miklum hraða.  Bílnum var veitt eftirför og náðist hraðamæling í eftirförinni þar sem ekið var með 180 km hraða á klukkustund.

Önnur lögreglubifreið frá Akranesi kom þegar til aðstoðar og bifreið úr Borgarnesi og bifhjól úr höfuðborginni voru  örskammt undan og tóku þátt í að reyna að stöðva akstur mannsins. Þegar sýnt var að ekki næðist að stöðva manninn áður en hann kæmist inn á Akranes dróu lögreglumenn úr ökuhraða en sáu hvar bílnum var ekið inn í bæinn og norður Esjubraut.  Bíllinn fannst svo mannlaus við Ægisbraut örskömmu síðar. 

Til ökumannsins sást í sjónhendingu við hús sem hann var talinn búa í og var ráðist til inngöngu í húsið eftir nokkra stund. Fóru sérsveitarmenn sem komnir voru á vettvang inn í húsið á undan almennum lögreglumönnum.  Var það gert í öryggisskyni en umræddur maður hefur að undanförnu verið í brotastarfssemi og iðulega verið vopnaður við handtökur, að sögn lögreglunnar á Akranesi.

Maðurinn reyndist hins vegar ekki vera í húsinu og var hafin leit að honum í bænum.  Bar sú leit árangur og var maðurinn handtekinn um kl 14:30.

Tíu grömm af fíkniefnum fundust í vegkantinum skammt frá staðnum sem bíllinn fannst og leikur grunar á því að maðurinn hafi kastað þeim út úr bílnum. Maðurinn er til viðbótar við framangreint grunaður um að hafa ekið bifreiðinni undir áhrifum fíkniefna. Hann gistir nú fangageymslur.