Hæstiréttur hefur frestað refsingu manns, sem var sakfelldur fyrir að hafa undir höndum vopn án þess að  tryggja viðeigandi og áskilda geymslu þeirra. Héraðsdómur Norðurlands eystra hafði áður dæmt manninn í 2 mánaða skilorðsbundið fangelsi og gert byssurnar upptækar en Hæstiréttur hafnaði upptöku vopnanna.

Byssurnar fundust í húsnæði sem maðurinn réði yfir á Húsavík. Einnig fundust byssur í húsi í Vogum á Vatnsleysuströnd en þeim hafði verið stolið á heimili mannsins í Norðurþingi.

Staðgengill heilbrigðisfulltrúans á Norðausturlandi kom því á framfæri við lögreglu, að íbúi í húsi á Húsavík hefði tilkynnt um vopn, eiturefni og jafnvel sprengiefni sem væru aðgengileg almenningi, þar sem hver sem væri kæmist inn á neðri hæð hússins, þar sem vopnin og efnin væru.

Lögreglan fór inn í húsnæðið, sem var í eigu þrotabús félags á Húsavík. Þar voru eiturefni, skotfæri og skotvopn á víð og dreif. Maðurinn var forsvarsmaður félagsins, sem starfaði við meindýraeyðingu.

Tveimur mánuðum síðar var brotist inn heimili mannsins í Norðurþingi og stolið rifflum, haglabyssu, skammbyssu og startbyssum. Lögregla hafði upp á flestum vopnunum í húsi á Vogum.

Hæstiréttur segir í dómi sínum, að þegar litið sé til þess að vopnin voru tekin í innbroti á heimili mannsins, að hann hafði sérstaka geymslu fyrir vopnin þó að hún væri ekki fullnægjandi, að hann virtist hafa átt stærstan þátt í að lögreglu tókst að upplýsa málið og endurheimta vopnin, og að gögn lágu fyrir um að maðurinn hefði endurbætt aðstöðu á heimili sínu í samráði við lögreglu, sé rétt að fresta refsingu hans í tvö ár. Refsingin fellur niður haldi maðurinn almennt skilorð á þeim tíma.