Matvælafrumvarpið var afar umdeild. Ómar Óskarsson

Atli Gíslason, þingmaður Vinstrihreyfingarinnar -græns framboðs og nefndarmaður í sjávarútvegs- og landbúnaðarnefnd, hefur sent Arnbjörgu Sveinsdóttur, formanni nefndarinnar, Einari K. Guðfinnsyni, sjávarútvegs- og landbúnaðarráðherra, og Ingibjörgu Sólrúnu Gísladóttur, utanríkisráðherra, bréf þar sem að krafist er allra gagna er varða samningaviðræður Íslands við Evrópusambandið um innleiðingu matvælalöggjafar ESB hér.

Landbúnaðarráðherra lagði í vor fram frumvarp á Alþingi til lögfestingar matvælalöggjöfinni og þar var m.a. gert ráð fyrir að innflutningur á hráu kjöti yrði heimilaður. Afgreiðslu málsins var frestað til hausts en VG beitti sér mjög gegn frumvarpinu á þeirri forsendu, að ekki hefði farið fram skoðun á því hverjar afleiðingarnar yrðu á því að leyfa innflutning á hráu kjöti fyrir heilsu manna og dýra sem og íslenska matvælaframleiðslu.
 
Í tilkynningu frá VG segir, að frá því að málið kom til kasta sjávarútvegs- og landbúnaðarnefndar þingsins hafi fulltrúi VG í nefndinni krafist fyrrnefndra gagna því ekki hafi komið fram af hálfu stjórnvalda af hverju þau féllu frá undanþágu, sem Ísland hafði um innflutning á hráu kjöti.

„Það er algjör frumforsenda í umfjöllun þessa máls að þessi gögn liggi fyrir og hneyksli að nefndarmönnum hafi ekki fyrir löngu verið afhent þau. Bréf sem þér er hér með sent sem viðhengi er enn ítrekunin á að fá þessi gögn en af augljósum ástæðum er kosið að gera bréfið opinbert," segir í bréfinu sem Atli hefur sent ráðamönnum.