Fíkniefnin sem fundust í húsbíl um borð í Norrænu á þriðjudaginn var eru mesta magn fíkniefna sem fundist hefur á Íslandi í einu.

Samkvæmt bráðabirgðaniðurstöðu lögreglu og tollyfirvalda voru 190 kíló af hassi í bílnum. Auk þess fundust 1,5 kíló af marijúana og eitt kíló af kókaíni við leitina.

Rannsókn málsins hefur verið færð í hendur fíkniefnadeildar lögreglunnar á höfuðborgarsvæðinu og var unnið langt fram á aðfaranótt fimmtudags við rannsókn málsins.

Fíkniefnin fundust í húsbíl um borð í ferjunni við tolleftirlit. Sjötugur hollenskur karlmaður sem kom á bílnum til landsins var handtekinn. Bíllinn var svo fluttur til Reykjavíkur í gær og er hann í vörslu embættis tollstjórans í Reykjavík. Að sögn Harðar Davíðs Harðarsonar, deildarstjóra hjá tollinum, stóð ítarleg leit yfir í bílnum í gær. „Við vonumst til að klára leitina í dag [í gær]. Þetta er stór bíll og það er mikið pláss í honum þannig að það tekur drjúgan tíma að leita af sér allan grun.“

Lögreglan verst frétta af málinu. Hörður Jóhannesson, aðstoðarlögreglustjóri lögreglunnar á höfuðborgarsvæðinu, segir rannsóknina á frumstigi.

„Þetta er gríðarlegt magn fíkniefna sem þarna fannst og það blasir alveg við að maðurinn hefur ekki ætlað sér að koma þessum efnum sjálfur í sölu hér á landi.“

Hörður segir rannsókn málsins nú beinast að því að finna vitorðsmann eða vitorðsmenn Hollendingsins hér á landi. „Ég get ekkert gefið upp um það á þessari stundu hvernig málinu miðar. Við erum bara að skoða alla þræði málsins.“

Maðurinn líklega komið áður

Heimildir 24 stunda herma að lögreglan hafi fengið ábendingu um að efnin væru um borð í ferjunni og sérstaklega hafi sú ábending tengst Hollendingnum sem handtekinn var. Talið er að hann hafi áður komið til landsins en það hefur ekki fengist staðfest. Hörður segir ljóst að fíkniefnum hafi oft áður verið smyglað til landsins með Norrænu.

„Ég get ekkert sagt um það hvort þessi maður hefur áður reynt að koma fíkniefnum til landsins með þessum hætti.“