Nú standa yfir framkvæmdir víðs vegar um landið og biður Vegagerðin vegfarendur um að virða merkingar og hraðatakmarkanir.

Búið er að færa umferð á Reykjanesbraut (41) til vegna framkvæmda við gerð undirgangna á Reykjanesbraut (41) milli Smáratorgs og Linda. Akreinum hefur verið hliðrað til suðausturs. Áætluð verkslok eru 15. nóvember 2008.

Þá er búið að færa umferð á nýja brú við Stapahverfi (mitt á milli Grindavíkurvegar og Njarðvíkur). Gert er ráð fyrir að þetta framhjáhlaup verði í notkun næstu 4 mánuði, þ.e. fram í byrjun október 2008. Vegfarendur eru beðnir um að sýna tillitssemi og virða hámarkshraða á svæðinu.

Viðgerð er einnig hafin á Óseyrarbrú milli Eyrarbakka og Þorlákshafnar, meðan viðgerð stendur yfir verður hámarkshraði tekinn niður í 50 km á vinnutíma og eru ökumenn vinsamlegast beðnir um að virða þær takmarkanir. Akbraut brúarinnar verður almennt greið, en vinna fer að mestu fram undir brúnni.

Framkvæmdir standa yfir við nýtt hringtorg Kársnesbrautar, Nýbýlavegar, Skeljabrekku og aðrein Hafnarfjarðarvegar (40). Að auki er ólokið framkvæmdum á Nýbýlavegi á milli Auðbrekku og Birkigrundar en verklok eru áætluð síðari hluta júní.

Vegna vinnu við mislæg gatnamót Arnarnesvegar og Reykjanesbrautar hefur Arnarnesvegi verið lokað til austurs (upp með hesthúsunum í Kópavogi) meðan framkvæmdirnar standa yfir.

Unnið er við yfirlögn á Borgarfjarðarbraut og er þar hætta á grjótkasti, vegfarendur beðnir að virða hraðatakmarkanir

Einnig eru vegfarendur minntir á að vegna framkvæmda við tvöföldun Reykjanesbrautar er nauðsynlegt að sýna þar sérstaka aðgát. Sérstaklega er fólk beðið um að fara varlega við framhjáhlaup við Voga, Grindavíkurveg og Njarðvík og er mikilvægt að virða hraðatakmarkanir.