eftir Andrés Þorleifsson andresth@mbl.is

„Gjaldtaka virðist líkleg til að breyta hegðun þó nokkuð mikið,“ segir Ingjaldur Hannibalsson, formaður skipulagsnefndar Háskólaráðs, um hugmyndir um að láta nemendur við Háskóla Íslands greiða fyrir bílastæði við skólann. Skipulagsnefnd lét nýverið kanna samgönguvenjur nemenda og starfsmanna og liggja nú fyrstu niðurstöður fyrir.

„66% segja að það sé mjög eða frekar líklegt að viðkomandi hætti að koma á einkabíl ef bílastæðin kosta þrjátíu þúsund krónur á misseri,“ segir Ingjaldur og bætir við að hlutfallið fari upp í 73% væri gjaldtakan 50 þúsund á misseri. Enn sé ekki búið að taka neinar ákvarðanir um gjaldtöku.

Þá reyndust 62% frekar eða mjög jákvæð gagnvart því að gefa vistvænum bílum ókeypis stæði.

Mikil andstaða reyndist vera við gjaldtöku meðal nemenda og starfsmanna Háskóla Íslands, en í könnuninni kom fram að um 80% þátttakenda voru mjög eða frekar neikvæð gagnvart hugmyndum um gjaldtöku meðan 20% voru mjög eða frekar jákvæð.