Bíladagar fara nú fram á Akureyri mbl.is/Hjálmar

Nóttin var fremur róleg hjá lögreglunni á Akureyri. Þrjár líkamsárásir voru tilkynntar til lögreglu. Einn var fluttur á sjúkrahús en ekki er vitað nánar um líðan hans. Einn ökumaður var stöðvaður grunaður um ölvun við akstur á Akureyri í nótt.

Lögreglan á Akureyri fékk í gærkvöldi nokkrar tilkynningar þar sem að fólk kvartaði undan miklum hávaða, reyk og óþef í og við hús þeirra vegna svokallaðrar „burn-out" keppni sem að fór fram á Akureyrarvelli í gærkvöld.

Þá barst lögreglu tilkynningu um líkamsárás á skemmtistað í miðbæ Akureyrar en þar lenti tveimur mönnum saman með þeim afleiðingum að annar gaf hinum olnbogaskot í andlitið. Tilkynnt var um tvær aðrar líkamsárásir við sama skemmtistað en í annarri líkamsárásinni stöðvuðu lögreglumenn mann sem að var að lemja annan í andlitið. Árásaraðilinn var handtekinn og vistaður í fangageymslu.

Þá barst lögreglu tilkynningu um að maður hafi dregið upp veiðihníf í samkvæmi í fjölbýlishúsi á Akureyri og hafi komið til einhverra orðaskipta þar. Lögreglan hafði upp á manninum sem að dró upp hnífinn og var hann fluttur á lögreglustöðina á Akureyri.

Þá var tilkynnt um nokkur skemmdarverk víðs vegar um bæinn en þar á meðal var tilkynnt um rúðubrot í heimahúsi á brekkunni en þar hafði einhver kastað steini í rúðu og brotið hana. Einnig hafði lögreglan afskipti af þremur mönnum sem að höfðu skemmt umferðarmerki í miðbæ Akureyrar.