P-3C Orion kafbátaleitarvél var meðal annars notuð til leitarinnar. mbl.is/Arnaldur

Leitin að íslensku seglskútunni Dystocia á hafsvæðinu milli Bermuda og Nýfundnalands sem staðið hefur yfir undanfarna þrjá daga hefur engan árangur borið. Bandaríska og kanadíska strandgæslan hafa í sameiningu leitað í um 40 flugtíma á einni P-3 Orion eftirlitsvél og fjórum Hercules C-130 vélum.

„Þeir eru búnir að leita á svæði sem er sexfalt Ísland og vel það án þess að finna nokkurn skapaðan hlut," sagði Hjalti Sæmundsson aðalvarðstjóri hjá Landhelgisgæslunni.

Formleg leit hófst í fyrradag en Landhelgisgæslan hefur haldið uppi fyrirspurnum og eftirgrennslan frá því að beiðni barst frá eiganda skútunnar þann 11. júní.

Seglskútan sem er 35 feta, einmastra af Bavaria gerð, er í eigu Íslendings og um borð er Íslendingur sem hugðist sigla skútunni til Íslands.

Hann lagði af stað frá Bermuda þann 31.maí eða 1.júní og ekki hefur náðst samband við hann síðan 3.júní. Hann er einn um borð.


„Það hefur því miður ekkert komið út úr þessu ennþá en dæmin sanna að skútur sem eru á ferðinni um höfin seinkar oft mikið, jafnvel mánuðum fram yfir áætlaðan. Það er ekki búið að afskrifa neitt, málið er enn í biðstöðu," sagði Hjalti í viðtali við Fréttavef Morgunblaðsins.

  Skipulagðri leit hefur verið hætt í bili en eftirgrennslan heldur áfram.