mbl.is

Bandaríska og kanadíska strandgæslan hafa í sameiningu staðið fyrir umfangsmikilli leit að seglskútunni Dystocia, á hafsvæðinu milli Bermuda og Nýfundnalands undanfarna daga. 

Þetta kemur fram í tilkynningu frá Landhelgisgæslunni í dag.

Seglskútan sem er 35 feta, einmastra af Bavaria gerð, er í eigu Íslendings og um borð er Íslendingur, Jakob Fenger, sem hugðist sigla skútunni til Íslands. 

Hann lagði af stað frá Bermuda þann 31.maí eða 1.júní og ekki hefur náðst samband við hann síðan 3.júní. 

Þann 11.júní hafði Landhelgisgæsla Íslands samband við bandarísku og kanadísku strandgæsluna, sem hafa umsjón með leitarsvæðinu og fór fram á að eftirgrennslan yrði hafin.  Þegar skútan hafði ekki skilað sér til St. John þann 13.júní var formleg leit hafin.  Jakob er einn um borð. 

Þrátt fyrir umfangsmikla leit hafa engin ummerki um skútuna komið fram.  Svæðið sem leitað hefur verið á er 635.000 ferkílómetrar og komu 4, C-130 Hercules og ein P-3 Orion eftirlitsflugvélar að leitinni.

Skipulagðri leit hefur verið hætt í bili en eftirgrennslan heldur áfram.