Yfir 35 milljónir króna söfnuðust í tengslum við söfnunarþáttinn „Á allra vörum,“ sem sýndur var í beinni útsendingu á Skjá Einum föstudagskvöldið 20. júní.

Ágóðinn rennur í sjóð söfnunarátaksins „Á allra vörum“, en markmið söfnunarinnar er að aðstoða Krabbameinsfélag Íslands við að kaupa stafrænan röntgenbúnað sem getur greint krabbamein í brjóstum á frumstigi betur en núverandi búnaður.  Þátturinn var sendur út á Skjá Einum, Rás 2, mbl.is og á skjarinn.is og var öll skipulagning og framkvæmd unnin í sjálfboðavinnu. 

Átakið „Á allra vörum“ er lokahnykkurinn í verkefninu en upphaf þess má rekja til þess er fimm hjón gáfu langstærstu gjöf sem gefin hafði verið Krabbameinsfélagi Íslands það er 120 milljónir til tækjakaupa.  Síðan þá hafa fjölmargir einstaklingar og fyrirtæki lagt hönd á plóginn og með átakinu „Á allra vörum“ og sjónvarpssöfnuninni hafa alls safnast um 55 milljónir króna frá því átakið hófst fyrir tæpum tveimur mánuðum.