Miðborgarþjónar svokallaðir hófu störf núna um helgina. Er um að ræða tilraunverkefni á vegum Reykjavíkurborgar en hlutverk þjónanna er að aðstoða gesti miðbæjarins um helgar og leysa ýmis verkefni sem ekki teljast til löggæslu en lögreglan hefur hingað til sinnt.

Að sögn Gottskálks Ágústssonar hjá Öryggismiðstöðinni, sem leggur til mannskap til starfans, heppnaðist fyrsta starfshelgin framar vonum. Var þjónunum mjög vel tekið af gestum og gangandi sem og dyravörðum og lögreglu. Fóru þeir um með skyndihjálparbúnað og drykkjarvatn í bakpokum sínum og aðstoðuðu þá sem höfðu gert sér fulldælt við Bakkus. Einnig voru þeir dyravörðum innan handar vegna hávaða og fólks sem fór út af öldurhúsum með drykki sína. Þegar leigubílaröðin tók að lengjast voru þjónarnir þeim sem biðu og bílstjórum innan handar við ýmislegt tilfallandi.

Gottskálk segir að verkefnið verði rætt á fundi með borgaryfirvöldum í dag og er hann bjartsýnn á framtíð þess miðað við hve vel gekk um helgina og hve vel miðborgarþjónunum hafi verið tekið.