Mun flytja einhver félög Baugs til annarra landa
Jón Ásgeir Jóhannesson, starfandi stjórnarformaður Baugs Group mbl.is/Kristinn
Eftir Agnesi Bragadóttur
agnes@mbl.is
Þetta kemur fram í viðtali við Jón Ásgeir í sunnudagsblaði Morgunblaðsins, þar sem hann gerir upp Baugsmálið, eins og það horfir við honum. Jón Ásgeir telur að lögin sem gera það að verkum, að hann verður að fara úr stjórnum félaga á Íslandi vegna hinnar skilorðsbundnu sakfellingar sem hann hlaut í Hæstarétti, séu vitlaus og þeim þurfi að breyta.
„Erlendis mun ég áfram sitja í stjórnum okkar félaga og hver af okkar félögum hér á landi verða flutt út, til Bretlands, Danmerkur eða Færeyja, á bara eftir að koma í ljós á næstu vikum,“ segir Jón Ásgeir.
Jón Ásgeir kveðst oft hafa verið bitur og reiður á undanförnum sex árum, því hann hafi oft verið beittur „ótrúlegum skepnuskap“. Þessi tími hafi reynst honum og fjölskyldu hans mjög erfiður.
„Vitanlega setur slík meðferð, sem varir svo lengi, ákveðið mark sitt á mann. Mér finnst Jón H.B. Snorrason og Arnar Jensson og menn sem unnu að rannsókn málsins hafa beitt viðurstyggilegum vinnubrögðum, sem verða þeim til ævarandi vansa,“ segir Jón Ásgeir.
