„Biðlistarnir eru langir,“ segir Maria Helena Sarabia, lærður leikskólakennari og starfandi dagforeldri. Hún segir að í Vesturbænum, þar sem hún starfar, séu fáir dagforeldrar að störfum og ástandið sé víða slæmt.

„Ég og móðir mín vinnum saman með tíu börn og við erum alltaf fullbókaðar,“ segir hún og bætir við að þær vilji ekki vera með eiginlega biðlista því það vekji falsvonir hjá foreldrum sem eru að leita lausna. „Það vantar klárlega fleiri til starfa,“ segir hún.

Öðruvísi en í Kólumbíu

„Ég er búin að búa á Íslandi í 18 ár og er íslenskur ríkisborgari,“ segir Maria. Hún kynntist íslenskum manni sínum þegar þau voru bæði í skiptinámi í Þýskalandi.

„Mamma talar við krakkana á spænsku og þau skilja hana alveg,“ segir Maria og bætir við að móðir hennar talar ekki ensku og litla íslensku. Mæðgurnar spila salsa- tónlist fyrir börnin og syngja, það er líf og fjör á heimilinu.

Björg Ingþórsdóttir, daggæslufulltrúi þjónustumiðstöðvar miðborgar og Hlíða segir foreldra leita mikið að þjónustu og lausn á vandanum að finna dagforeldra.

„Dagforeldrum hefur fækkað á okkar svæði,“ segir hún og bætir við að nýir dagforeldrar starfi oft tímabundið en starfi oft lengur en upphaflega stóð til.