Maðurinn sem sérsveitarmenn lögreglunnar handtóku í Grímsey sl. laugardag var yfirheyrður af lögreglunni á Akureyri í gær. Maðurinn, sem er rétt rúmlega tvítugur, hafði haft í hótunum við fólk á staðnum og gert misheppnaða tilraun til þess að stinga mann með hnífi sem hann varð sér úti um í fiskvinnsluhúsnæði á staðnum. Á næstunni verða teknar skýrslur af vitnum og í kjölfarið tekin ákvörðun um hvort gefin verður út ákæra.

„Þetta er ekki stórvægilegt brot. Hann meiðir engan þótt þarna hafi auðvitað skapast alvarlegt ástand,“ segir Jóhann Olsen, varðstjóri hjá lögreglunni á Akureyri. Engin löggæsla er í Grímsey að staðaldri. Maðurinn var ekki yfirheyrður strax þar sem hann var ölvaður og líklega undir áhrifum fíkniefna. Gisti hann fangageymslur aðfaranótt sunnudags en nýtur núna aðstoðar fagfólks sem reynir að „koma honum á réttan kjöl.“

Var einn á ferð í Grímsey

Áður en sérsveitarmenn lögreglunnar handtóku manninn hafði óbreyttum borgara í Grímsey tekist að róa hann mikið niður og ræða við hann. Var maðurinn því „þokkalega rólegur“ og hættuástand yfirstaðið þegar sérsveitin kom á vettvang, samkvæmt upplýsingum frá lögreglu.

Maðurinn, sem var einn á ferð í Grímsey, var dæmdur í 20 mánaða fangelsi í Héraðsdómi Norðurlands eystra í upphafi þessa mánaðar fyrir ýmis hegningarlagabrot, þar á meðal þrjár hnífstungur, líkamsárás og fíkniefnabrot. Samkvæmt upplýsingum frá lögreglunni á Akureyri er „mikil gremja í fólki“ fyrir norðan yfir því að maðurinn gangi laus og hafi embættinu borist mörg símtöl þess efnis. Bæði sakborningur og ákæruvald hafa lögum samkvæmt áfrýjunarfrest sem lengir þann tíma sem líður að fullnustu dómsins.

Flugvél með sjúkraflutningamönnum var aftur send til Grímseyjar seinna sama kvöld vegna annars ungs manns sem var þar í annarlegu ástandi og voru nokkrir sérsveitarmenn þá einnig með í för en ekkert hættuástand skapaðist. Var maðurinn veikur vegna áfengis- og vímuefnaneyslu og þurfti að komast á sjúkrahús til aðhlynningar. Mennirnir tveir þekkjast en ekki er vitað um frekari tengsl á milli þeirra.