Karlmaður var í Héraðsdómi Reykjaness í dag sakfelldur fyrir brot gegn valdstjórninni, nytjastuld og ölvunarakstur. Með vísan til verulegs og óútskýrðs dráttar á rannsókn og ákvörðun um saksókn var þótti refsing ákærða hæfilega ákveðin 4 mánaða fangelsi sem bundið var skilorði í 2 ár. Jafnframt var manninum gert að greiða 280.000 króna sekt í ríkissjóð og allan sakarkostnað málsins. Hann var sviptur ökurétti í 4 ár.

Maðurinn var ákærður fyrir að hafa aðfaranótt  20. október 2005, á lögreglustöðinni í Reykjanesbæ, veist með ofbeldi að lögreglumanni slegið hann hnefahöggi í vinstri kjálka, þannig að lögreglumaðurinn hlaut mar yfir kjálkann. Að hafa í beinu framhaldi af framangreindu broti, í bifreiðageymslu lögreglustöðvarinnar, ræst í heimildarleysi lögreglubifreið og ekið henni á syðri hurð geymslunnar.

Umferðarlagabrot, með því að hafa 9. desember 2007, ekið bifreið sviptur ökuréttindum og undir áhrifum áfengis (vínandamagn í blóði 2,35 ‰) norður Faxabraut, Reykjanesbæ, þar til lögregla stöðvaði akstur hans á mótum Faxabrautar og Suðurgötu.