Íslendingar drekka meira af hvítvíni, rauðvíni og bjór um mitt sumar þegar flestir eru í sumarfríi, heldur en á vorin og haustin miðað við sölutölur frá Áfengis- og tóbaksverslun ríkisins, ÁTVR. Í júlí og ágúst í fyrra var salan á hvítvíni 50,18 prósentum meiri en í september og október samkvæmt útreikningum ÁTVR. Salan á rauðvíni var 36,19 prósentum meiri og salan á lagerbjór 38,74 prósentum meiri.

Aukin drykkja foreldra á sumrin veldur í mörgum tilfellum börnum kvíða, að sögn Valgerðar Rúnarsdóttur, læknis á Vogi.

Skrúfa frá fernu á kvöldin

„Fólk fær sér í glas þegar það er að grilla og svo í sumarbústaðnum. Sumir eru með vínfernu á eldhúsborðinu og skrúfa frá þegar þeir koma heim á kvöldin til að slaka á yfir glasi af víni. En þótt fólk líti ekki á sig sem alkóhólista getur drykkja þess valdið því að börnin kvíða sumarfríinu. Foreldrarnir verða „öðruvísi“ en þeir eiga að sér og það gerir börnin óróleg auk þess sem foreldrarnir eru ekki í stakk búnir til þess að gæta öryggis barnanna sem skyldi þótt þeir telji sig geta það,“ bendir Valgerður á.

Á Vogi hófst síðastliðinn vetur sérstök meðferð fyrir börn áfengissjúklinga, fyrst og fremst fyrir börn sjúklinga og þau sem félagsmálayfirvöld Reykjavíkurborgar hafa haft afskipti af, að því er Valgerður greinir frá. „Drykkja foreldra hefur gríðarleg áhrif á börnin. Sjúklingarnir okkar hafa oftar en ekki orðið fyrir ýmsum áföllum vegna drykkju sinna foreldra og þeir vilja alls ekki að börnin þeirra lendi í því sem þeir lentu í. Fólk sem gerir sér dagamun í sumarfríinu með því að fá sér í glas áttar sig kannski ekki á því hversu næm börnin eru á þetta.“