Alls voru 110 ökumenn stöðvaðir fyrir að aka of hratt í umdæmi lögreglunnar á Hvolsvelli í liðinni viku en sá sem hraðast ók var á 140 km hraða og má hann búast við 90 þúsund króna sekt. Frá áramótum hafa 1062 verið stöðvaðir fyrir að aka of hratt af lögreglunni á Hvolsvelli.

Í vikunni voru átta ökumenn stöðvaðir grunaðir um að hafa ekið undir áhrifum áfengis. Einnig voru fimm ökumenn stöðvaðir grunaðir um að hafa ekið undir áhrifum fíkniefna.

Fjórir þjófnaðir voru tilkynntir í vikunni og þar af var bakpoka stolið utan við Kjarval á Hellu en útlendur ferðamaður brá sér þar inn og á meðan var stórum bakpoka hans með vegabréfum hans, farseðlum og eigum. Um er að ræða Vortex bakpoka sem er grár og blár að lit.

Fjögur umferðaróhöpp voru tilkynnt í vikunni en engin slys urðu á fólki. Hjólhýsi fauk á hliðina undir Eyjafjöllum en það var á ferð aftan í bíl er vindhviða tók það.

Alls voru 16 fíkniefnamál sem komu upp í vikunni en fíkniefnadeild og lögreglan voru með eftirlit og stöðvuðu umferð á Suðurlandsvegi. Þetta skilað tíu fíkniefnamálum og í einu tilvikanna var um umtalsvert magn að ræða. Í þessu eftirliti kom einnig í ljós fíkniefnaakstur. Þess má geta að fíkniefni geta verið lengi í blóði og þvagi í allt að sex vikur eftir neyslu.

Mikill viðbúnaður var hjá lögreglunni á Hvolsvelli vegna Landsmóts hestamanna á Gaddstaðaflötum, sem haldið var í vikunni. Mótið fór vel fram og eru lögreglumenn afar sáttir við þá stemmingu sem var á mótinu. Tilkynnt var um í átta tilfellum um slagsmál inn á mótssvæðinu, en engar kærur vegna líkamsárása hafa verið lagðar fram.

Sex minniháttar fíkniefnamál komu upp inni á mótssvæðinu. Öflugt eftirlit var með þessum málaflokki og voru menn frá fíkniefnadeild lögreglunnar á höfuðborgarsvæðinu okkur til aðstoðar.

Flugbjörgunarsveitarmenn frá Hellu sáu um gæsluna inni á svæðinu ásamt lögreglu og eru menn afar sáttir með samstarfið og mótshaldið. Fór mótið mjög vel fram í alla staði en er mest var á mótinu er talið að um 13 – 15 þúsund manns hafi verið þar, samkvæmt dagbók lögreglunnar á Hvolsvelli.