Mikilvæg tól í dómsmálum

„Það væru mistök að hætta að styðjast við greiningar á áfallastreituröskun í kynferðisbrotadómum,“ segir dr. Berglind Guðmundsdóttir, sálfræðingur hjá Neyðarmóttöku Landspítalans.

Eins og sagt var frá í 24 stundum í gær bendir Jón Steinar Gunnlaugsson hæstaréttardómari, í grein sem hann ritar, á að erfitt sé að vita hvað það er sem veldur röskun eða vanlíðan. Segir hann greiningu á áfallastreituröskun ekki til þess fallna að sanna sök sakbornings.

Kærandi geti jafnvel upplifað áfallastreituröskun vegna kærunnar og niðurlægingar sem henni fylgir.

Sýnir ekki mikla þekkingu

„Hann er að ljá máls á mikilvægu máli,“ segir Berglind. „En því miður sýnir hann ekki nægilega mikla þekkingu á áfallastreituröskun.“

Hún segir mjög erfitt fyrir kæranda að gera sér upp áfallastreituröskun sem viðbrögð við kynferðisofbeldi. „Viðkomandi þarf þá að hafa gríðarlega mikla þekkingu á áfallastreituröskun og vita að hverju greinandinn leitar.“

Spurningalistar eru aðeins lítill hluti af þeim tólum sem notuð eru til að greina áfallastreituröskun, segir Berglind. Einnig sé viðkomandi tekinn í ítarleg viðtöl, enda einkennin ekki augljós.