Það eru ekki bara fyrirtæki sem geta fengið heimild til innflutnings á hráu kjöti og pylsum að ákveðnum skilyrðum uppfylltum, þar á meðal með því að framvísa heilbrigðisvottorði og vottorði um uppruna vörunnar, heldur einnig ferðamenn.

„Ef einstaklingur getur útvegað það vottorð sem krafist er og yfirvöld hér samþykkja það þá er ekkert því til fyrirstöðu að hann geti flutt inn hrátt kjöt. Það eru mörg dæmi um að fólk fái heimild til að flytja inn vöru frá til dæmis Spáni, Ítalíu eða öðrum Evrópulöndum,“ segir Ólafur Friðriksson, skrifstofustjóri í sjávarútvegs- og landbúnaðarráðuneytinu.

Ef matvælafrumvarpið sem nú liggur fyrir Alþingi verður samþykkt verður innflutningur á hráu kjöti heimilaður.