Endurvinnslan hf. endurgreiddi íslenskum neytendum rúmlega 930 milljónir króna í fyrra fyrir flöskur og dósir sem þeir skiluðu til Sorpu og annarra umboðsmanna fyrirtækisins, að sögn Eiríks Jónssonar, skrifstofustjóra hjá Endurvinnslunni.

Hann segir skilahlutfallið á Íslandi hafa verið með því mesta í heiminum. „Miðað við framleiðslu og sölu voru skilin um 80 prósent í fyrra og hittiðfyrra. Þau fóru hins vegar fyrir nokkrum árum upp í allt að 85 prósent.“

Of snemmt er að segja til um hvort skilin nú séu orðin meiri en áður vegna efnahagsástandsins. „Okkur grunar að ástandið hafi áhrif en það er of snemmt að segja til um það. Við þyrftum að meta það í árslok,“ tekur Eiríkur fram.

Veðurfarið er líka áhrifaþáttur, að sögn Eiríks. „Skilin eru þess vegna góð núna. Fólk fer ekki í tiltektina fyrr en veðrið skánar. Ef færðin er til dæmis slæm að vetrarlagi detta skilin niður. Menn geyma þá flöskurnar og dósirnar í bílskúrnum á meðan.“

Áldósirnar eru pressaðar í Endurvinnslunni, settar í gáma og seldar til Bretlands. „Það fæst gott verð fyrir álið sem er hnitaál og má ekki fara í álverið hér. Það eru sérhæfðar verksmiðjur sem nota álið. Það fer nánast allt í áldósir þegar búið er að bræða það,“ greinir Eiríkur frá.

Plastflöskurnar eru pressaðar og fluttar til Evrópu og Bandaríkjanna þar sem þær eru tættar niður í flögur sem notaðar eru meðal annars við framleiðslu á pólýesterefni. Eiríkur segir íslensku plastflöskurnar eftirsóknarverðar þar sem hráefnið þyki gott.

„Við myljum niður glerið en fáum ekkert fyrir það. Ákveðinn aðili tekur við glermulningnum sem er mjög gott fyllingarefni í sorphauga því að hann lokar þeim. Það er einnig hægt að nota hann sem fyllingarefni við vegagerð.“