Þórunn Sveinbjarnardóttir segist að svo stöddu ekki geta svarað þeirri spurningu hvort hún muni beita sér gegn því að veittar verði útblástursheimildir til þeirra nýju álvera sem sótt hafa um. Hún hefur lýst því yfir að hún sé á móti nýjum álverum og að fjölgun þeirra séu ekki í samræmi við stefnu stjórnvalda í loftslagsmálum. Úthlutunarnefnd losunarheimilda er skipuð þremur fulltrúum, þar af einum skipuðum af umhverfisráðherra. „Fulltrúi umhverfisráðuneytisins starfar í trúnaði við ráðherra og í samræmi við þá stefnu sem fyrir liggur,“ segir hún aðspurð um hvort fulltrúi hennar muni leggjast gegn losunarheimildum til nýrra álvera.

„Það samrýmist ekki vel,“ segir Þórunn um það hvort fjölgun álvera samrýmist samdrætti í losun. „Allir sem hafa eitthvað kynnt sér stöðu þessara mála sjá auðvitað hvernig staðan er, og hvernig sem semst á leiðinni frá Balí til Kaupmannahafnar þá liggur fyrir að við eins og önnur ríki heims munum þurfa að draga úr losun gróðurhúsalofttegunda,“ bætir hún við.