Hæstiréttur hefur staðfest úrskurð Héraðsdóms Reykjavíkur um að karlmaður sæti gæsluvarðhaldi fram á föstudag en hann er grunaður um að hafa stungið annan karlmann í hálsinn með hnífi að morgni síðasta laugardags.

Fram kemur í úrskurði héraðsdóms að lögreglan hafi verið kölluð  að skemmtistað við Tryggvagötu vegna manns sem ógnaði fólki þar með hnífi. Þegar lögreglan kom á staðinn sá hún menn í átökum. Lögreglumennirnir handtóku mann og á sama tíma komu þangað dyraverðir á öðrum skemmtistað og í fylgd þeirra var maður, sem var með stungusár á hálsi. Sögðu dyraverðirnir, að maðurinn, sem hafði verið handtekinn, hefði stungið hinn manninn.

Sá sem fyrir árásinni varð var fluttur á sjúkrahús en meintur árásarmaður á lögreglustöð. Í buxnavasa hans fannst blóðugur hnífur, einkennilegur í laginu og líktist helst laufblaði.

Fram kemur í læknisvottorði, að sá sem varð fyrir árásinni hafi fengið 5 sentimetra djúpt sár en hnífsblaðið fór að mestu leyti  í gegnum vöðva og inn að hryggsúlu. Segir ljóst að um alvarlegan áverka sé að ræða og hafi litlu mátt muna að mikilvæg líffæri laskist sem hefði getað leitt til lífshættulegs ástands, örkumla eða jafnvel dauða.

Sakborningurinn kannaðist ekki við að hafa borið hníf á sér og ekki beitt hnífi í átökunum við hinn manninn. Segir í dómsúrskurðinum, að maðurinn haldi því fram að hugsanlega hafi  hnífnum verið komið fyrir í vasa hans. Lögreglu þykir hins vegar kominn fram rökstuddur grunur um að maðurinn hafi framið brot sem varði allt að 16 ára fangelsisrefsingu.