Skemmdir hafa verið unnar á nýju vegglistaverki eftir aðeins tvo daga. mynd/bb.is

Skemmdir hafa verið unnar á vegglistaverki, sem krakkar á námskeiði í veggjalist gerðu um helgina á Ísafirði. Svo virðist vera sem einhverskonar verkfæri hafa verið notuð við það að rispa og rista í verkið.

„Þetta er auðvitað leiðindamál“, segir Helga Lind Mar, starfsmaður Félagsmiðstöðvarinnar á Ísafirði, „Krakkarnir voru búnir að vera duglegir að vinna við þetta skemmtilega verk og ömurlegt það séu einhverjir í bænum sem sjá sig knúna til að eyðileggja þetta. Krakkarnir ætla að klára verkið um helgina og ég vona bara að þessir aðilar sjái sér fært að leyfa fullkláruðu verki að standa í friði“.

Félagsmiðstöðvar Ísafjarðarbæjar héldu í síðustu viku þriggja daga námskeið í samstarfi við Vinnuskóla Ísafjarðarbæjar þar sem krökkum voru kennd undirstöðuatriði þessarar listgreinar. Leiðbeinandi á námskeiðinu var Árni Már Erlingsson og en lokaverkefni þátttakenda námskeiðsins var að mála listaverk á veggi ganganna á milli Hafnarstrætis og Aðalstrætis.

Verkið hefur vakið athygli og ánægju íbúa á svæðinu og þeirra sem leggja leið sína í gegnum göngin. Eitt vekur sérstaka athygli og það eru stensilmyndir af Jakobi Frímanni Magnússyni, framkvæmdarstjóra miðborgarmála Reykjavíkurborgar. Að sögn Helgu Lindar er þetta létt skot á Jakob Frímann vegna frétta um að hann hafi látið mála yfir allar veggjalistmyndir í miðborg Reykjavíkur.

„Myndina bjuggu krakkarnir sjálfir til og sýnir Jakob Frímann haldandi á úðabrúsa. Krakkarnir áttu að koma sjálfir með myndir til að setja á vegginn og þetta fannst þeim viðeigandi“, segir Helga Lind.

Jakob Magnússon með úðabrúsann.