mbl.is/Golli

eftir Jón Pétur Jónsson jonpetur@mbl.is

Landsvirkjun hyggst una ákvörðun Skipulagsstofnunar um að fyrirhuguð borun rannsóknarholu í Gjástykki norður af Kröflu skuli háð mati á umhverfisáhrifum. Upplýsingafulltrúi Landsvirkjunar gagnrýnir hins vegar hvað það hafi tekið Skipulagsstofnun langan tíma að komast að niðurstöðu í málinu.

„Við sóttum um umsögn hjá Skipulagsstofnun í mars. Og samkvæmt reglunum eigum við að fá svar innan fjögurra vikna,“ segir Þorsteinn Hilmarsson, upplýsingafulltrúi Landsvirkjunar í samtali við mbl.is. 

Frestur til að kæra ákvörðun Skipulagsstofnunar er fjórar vikur, en Þorsteinn segir að Landsvirkjun hyggist ekki nýta sér þann rétt. „Við reiknum með því að fara í mat á umhverfisáhrifum með þetta,“ segir Þorsteinn.

„Það er mjög bagalegt hvað þetta er búið að taka langan tíma. Kjarni málsins var sá, bæði út frá því að lágmarka áhrif af svona framkvæmd og líka út af verkefninu um að skoða orkumál fyrir álver á Bakka, þá var mikilvægt að þetta færi fram núna í sumar,“ segir Þorsteinn og bætir við að nú sé ljóst að mat á umhverfisáhrifum fari ekki fram í sumar. Hann á hins vegar von á því að það muni gerast í júlí og ágúst á næsta ári.

Hann segist ekki geta fullyrt um það hvaða áhrif ákvörðun Skipulagsstofnunar geti haft á viljayfirlýsingu, sem er í gildi milli Landsvirkjunar og Alcoa, varðandi orkuöflun fyrir fyrirhugað álver á Bakka. „Tíminn verður að leiða í ljóst hvort að þetta feli í sér að við höfum ekki nægar upplýsingar þegar líður að lokum viljayfirlýsingartímabilsins sem er á næsta ári,“ segir Þorsteinn.

Að loknu umhverfismati mun Skipulagsstofnun taka málið aftur til umfjöllunar og gefur að lokum út álit, sem er ekki bindandi. Það er svo viðkomandi sveitarfélags að taka afstöðu til álitsins, en sveitarfélagið tekur svo endanlega ákvörðun um það hvort veita eigi framkvæmdarleyfi eður ei.