Björn Bjarnason dómsmálaráðherra fór ekki að tillögu nefndar sem fjallar um hæfi umsækjenda þegar hann skipaði í embætti héraðsdómara við Héraðsdóm Austurlands.

Björn skipaði Halldór Björnsson í embættið en hann var ásamt þeim Önnu Mjöll Karlsdóttur, Guðmundi Kristjánssyni og Pétri Dam Leifssyni metinn mjög vel hæfur af nefndinni. Nefndin taldi Önnu Mjöll „best til þess fallna að hljóta skipun að þessu sinni“. Pétur Hafstein formaður nefndarinnar segir að þrátt fyrir þetta mat hafi hann ekkert við skipunina að athuga.

Þeir Guðmundur, Halldór og Pétur voru allir metnir hæfari en Þorsteinn Davíðsson sem Árni Matthiessen, þá settur dómsmálaráðherra, skipaði í embætti héraðsdómara við Héraðsdóm Norðurlands eystra og Héraðsdóm Austurlands í desember síðastliðnum. Í kjölfarið kærðu þeir Guðmundur og Pétur skipunina til umboðsmanns Alþingis og er búist við áliti hans í lok sumars.