Bann Þingvallanefndar við þyrluflugi í þjóðgarðinum í sumar var ákveðið á fundi fyrir síðustu helgi og segir Björn Bjarnason, formaður nefndarinnar, að ekki verði flogið yfir svæðið nema með hennar leyfi og sé bannið byggt á heimild í Þingvallalögum. Formsatriði sé að hafa samband við Flugmálastjórn, sem virðist leggja annan skilning í bannið en nefndin.

„Landeigandi getur ekki bannað að það sé flogið yfir landið hans,“ segir Valdís Ásta Aðalsteinsdóttir, upplýsingafulltrúi Flugmálastjórnar, sem telur Þingvallanefnd ekki hafa vald til að banna allt þyrluflug yfir svæðinu. „Það er Flugmálastjórn Íslands sem stjórnar loftrýminu,“ bætir hún við til útskýringar. Lendingar og lágflug undir 500 fetum geti landeigendur komið í veg fyrir, en meira mál sé að banna flug í almennri flughæð.

Valdísi er ekki kunnugt um nein svæði á Íslandi þar sem flug er alveg bannað, slíkt hafi þó til dæmis verið gert í tengslum við heræfingar. Ef vilji sé hjá nefndinni til að banna flugið þurfi hún að senda beiðni til Flugmálastjórnar, sem síðan taki ákvörðun í framhaldinu.