Geir H. Haarde forsætisráðherra segir að með því að ráða Tryggva Þór Herbertsson, forstjóra fjárfestingabankans Askar Capital, sem efnahagsráðgjafa forsætisráðherra til sex mánaða sé ætlunin að styrkja forsætisráðuneytið enn frekar í baráttunni við aðsteðjandi efnahagsvanda.

Staða efnahags- og fjármála hér heima og erlendis hefur valdið miklu álagi í forsætisráðuneytinu, að sögn Geirs. Hann telur að Tryggvi verði mjög öflugur liðsauki og er ánægður með að hafa fengið hann til starfa. Geir telur að Tryggvi henti ákaflega vel til starfans og bendir á að hann hafi verið prófessor í hagfræði og forstöðumaður Hagfræðistofnunar HÍ, auk þess að vinna í bankaheiminum.

„Mitt hlutverk verður að aðstoða forsætisráðherra við að leiða saman fólk til að koma með lausnir,“ segir Tryggvi Þór. „Ég er ekki töframaður frekar en aðrir, en ég ætla að leggja mitt ýtrasta af mörkum til þess að aðstoða við að hrinda í framkvæmd því sem er í undirbúningi, koma með nýjar hugmyndir og almennt að aðstoða forsætisráðherra í því hlutverki hans að vera ráðherra efnahagsmálanna.“

Verðbólgu verður að ná niður

Hann segist hafa mestar áhyggjur af fjármálastöðugleikanum, en af þeim þjóðhagsstærðum sem oftast er fjallað um í fréttum hafi hann mestar áhyggjur af verðbólgunni. „Henni verður að ná niður, því ef hún nær að grafa um sig þá mun það leiða til mikillar kjararýrnunar fyrir almenning.“ Þá segir hann að það þurfi að koma hagvextinum af stað aftur.

Í hnotskurn

» Efnahagsráðgjafi starfaði í forsætisráðuneytinu á árum áður, en svo hefur ekki verið í nokkur ár.
» Verkefni nýráðins efnahagsráðgjafa verða m.a. að veita almenna ráðgjöf í efnahagsmálum, ekki síst varðandi alþjóðlegt efnahagsumhverfi og áhrif þess hér.
» Tryggvi Þór Herbertsson er frá Neskaupsstað. Hann er doktor í þjóðhagfræði.
» Tryggvi hefur verið forstjóri Askar Capital og var áður forstöðumaður Hagfræðistofnunar og prófessor við Háskóla Íslands.