Sverrir Vilhelmsson

Hæstiréttur hefur staðfest úrskurð Héraðsdóms Reykjavíkur um að pólskur karlmaður um tvítugt, sem nýlega var dæmdur í 3 ára fangelsi fyrir nauðgun, skuli sæta farbanni þar til dómur fellur í máli hans í Hæstarétti.

Fram kemur í dómi Hæstaréttar, að foreldrar mannsins eru búsettir hér á landi og hann býr hjá móður sinni. Hann sagðist hins vegar þurfa að fara til Póllands til að leita til geðlæknis en hann hefði verið í læknismeðferð þar og þyrfti að halda henni áfram.  Of dýrt væri fyrir sig að leita til geðlæknis hér á landi.

Hæstiréttur segir, að maðurinn hafi verið dæmdur til þungrar refsingar fyrir alvarlegt brot gegn almennum hegningarlögum.  Hann sé erlendur ríkisborgari og ekki annað fært en að farbanni verði beitt til að tryggja að hann maðurinn til staðar þegar dómur gengur í Hæstarétti og til afplánunar á hugsanlegri fangelsisrefsingu.

Maðurinn var dæmdur fyrir að nauðga konu á hótelsalerni í mars árið 2007. Maðurinn var fyrst sýknaður í héraðsdómi en Hæstiréttur ómerkti sýknudóminn og sendi málið aftur heim í hérað. Héraðsdómur dæmdi í málinu að nýju í júní, sakfelldi manninn og dæmdi hann í 3 ára fangelsi.