Þórarinn Tyrfingsson, yfirlæknir SÁÁ á Vogi, segir starfsfólk á Sjúkrahúsinu Vogi ekki hafa haft undan allt þetta ár vegna þess fjölda sem leitar sér aðstoðar vegna fíkniefnavanda. „Það eru margir sem þurfa skyndiinnlögn vegna slæms ástands og afeitrunar. Álagið hefur verið óvenjulega mikið fyrri hluta ársins og áberandi er hvað margir eru að leita í meðferð í fyrsta sinn.“

Þórarinn segir að tölur frá árinu 2007 sýni að fíkniefnavandinn sé álíka mikill og hann hefur verið síðustu tvö til þrjú ár. „Hann er hvorki að aukast né minnka. Hann hefur þó í sjálfu sér ekki verið meiri í sögu Íslands, en hann er þessi árin.“

Hann segir erfitt að átta sig almennilega á stöðunni yfir sumarmánuðina, þar sem mikið los sé á fólki. „Við munum sjá í haust hvort þessi mikla ásókn sem hefur verið það sem af er ári mun halda áfram.“

Að sögn Þórarins hefur umfang starfseminnar á Vogi verið svipað og undanfarin ár, þó að áskónin hafi verið umtalsvert meiri. Aðspurður hvort aukið fjármagn þurfi til rekstrarins segir Þórarinn að það sé alltaf spurning um val hvað menn vilji setja í þetta mikla peninga. „Það er þó margt sem má betur fara.“

Tölur SÁÁ benda til þess að örvandi vímuefnaneysla, það neysla á amfetamíni, kókaíni og e-pillum, hafi farið vaxandi en heldur dregið úr morfín- og lyfjaneyslu.

Í SÁÁ-blaðinu sem út kom í maí síðastliðnum kemur fram að fjöldi þeirra sem neyta örvandi efna hafi verið um 750 talsins árið 2007 á Vogi og hefur fjöldinn nærri fjórfaldast á síðustu tólf árum. Fjöldi kannabisfíkla á Vogi hefur sömuleiðis margfaldast á síðustu árum. atlii@24stundir.is