mbl.is/Július

Lögreglan handtók karlmann og tvær konur fyrir utan heimili í Reykjavík í nótt. Maðurinn var grunaður um að aka undir áhrifum áfengis og þegar lögreglan hugðist hafa afskipti af honum sýndi hann mótþróa og veittist fólkið að lögreglumönnunum.

Rétt upp úr miðnætti barst tilkynning um að ökumaðurinn æki ölvaður. Lögreglan hafði uppi á honum en hann sinnti ekki merkjum lögreglu um að stöðva. Að sögn lögreglu reyndi ökumaðurinn ekki að flýja heldur ók hann að heimili sínu og veitti lögreglan eftirför.

Maðurinn sýndi mótþróa þegar lögreglan hafði afskipti af honum sem fyrr segir. Tvær konur, sem voru farþegar í bifreiðinni, veittust í framhaldinu að lögreglumönnunum. Lögreglumennirnir beittu varnarúða og lögreglukylfum til að ná stjórn á ástandinu. Þeir kölluðu eftir aðstoð og var fólkið handtekið. Það gistir nú fangageymslur.

Að sögn lögreglunnar á höfuðborgarsvæðinu hlutu lögreglumennirnir minniháttar áverka og létu skoða sig á slysadeild.