Eftir Hjálmar Stefán Brynjólfsson hsb@mbl.is

 Undanfarið hefur verið unnið að því að reisa aflþynnuverksmiðju á Krossanesi. Vinnan hefur þokast afar hægt síðustu vikur eftir að samningum við verktakann sem reisa átti verksmiðjuna var sagt upp. Nýir verktakar hafa tekið við því verkefni að reisa verksmiðjuna. Dómsmál vegna samningsins við fyrri verktaka sem var rift verður rekið á Ítalíu.

Upphaflega var samningur gerður á milli ítalska verktakafyrirtækisins D&V og íslenska félagsins Becromal Properties ehf. sem er að 60% í eigu Strokks ehf. og 40% í eigu fyrirtækisins Becromal S.pa. Í samningnum var kveðið á um að D&V reisti verksmiðju í eigu Becromal Properties, sem væri leigð til Becromal Iceland ehf. undir starfsemina.

Þessum samningi hefur verið rift og eru sagðar margvíslegar ástæður fyrir því. Í grunninn má segja að óánægja sé hjá Becromal Properties með það hvernig verkið hefur verið unnið, en D&V telja sig ekki hafa fengið greitt að fullu.

Þar með er ekki öll sagan sögð. Ítalska verktakafyrirtækið D&V fékk íslensk verktakafyrirtæki til liðs við sig. Þessum íslensku verktökum hefur verið sagt upp um leið og ítalska verktakanum var sagt upp.

Fæstir íslensku verktakanna bera framkvæmdinni vel söguna og segja margt óljóst enn við verksmiðjuna. Til dæmis liggja endanlegar teikningar að verksmiðjunni ekki fyrir. Þeim teikningum, sem notast hefur verið við, hefur verið margvíslega breytt frá því framkvæmdir hófust. Ýmsar verkfræðilegar úrlausnir virðist vanta inn á teikningarnar. Einn viðmælanda Morgunblaðsins gaf í skyn að ástandið hefði verið stjórnlaust.

Í dag verða samningar undirritaðir við nýja verktaka og segir framkvæmdastjóri Strokks ehf., Eyþór Arnalds, að málið muni í kjölfarið leysast og vinna fara á fullan snúning.

Ljóst er þó að nýir verktakar verða að hafa hraðar hendur, en samkvæmt samningum sem liggja fyrir mun Becromal-verksmiðjan í haust kaupa raforku sem nota á við gerð aflþynnanna.