Niðurrifi á öllum húsum við Dísarland á að vera lokið fyrir 15. ágúst. mynd/bb.is

Dísarlandið í Bolungarvík er mannlaust en búið er að rýma öll húsin í götunni. Rífa á húsin en rýma þarf svæðið fyrir snjóflóðavarnargarð sem á að rísa í hlíðinni.

Sigurgeir Jóhannsson var síðasti íbúi Dísarlands en hann flutti í nýtt húsnæði fyrir viku síðan. Þessa dagana er hann að klára að hreinsa út föggur sínar áður en vinnuvélar rífa fyrrum heimili hans við Dísarland 14. Að hans sögn verður farið í að rífa húsið á næstu dögum en niðurrifi á öllum húsum í götunni á að ljúka fyrir 15. ágúst.

„Það er auðvitað ömurlegt að sjá þetta rifið“, segir Sigurgeir og segir að það sé ekki spurning að hægt hefði verið að tryggja öryggi íbúa með minni mannvirki en varnargarðurinn á að vera. „Ég er auðvitað ekki á móti snjóflóðavörnum en þetta er gríðarlegt mannvirki og leiðinlegt að sjá götuna tæmda fyrir það“, segir Sigurgeir.  

bb.is