Nema í fornleifaskólanum að störfum í Vatnsfirði. mbl.is/Árni Sæberg

Opinn dagur verður við minjastaðinn í Vatnsfirði við Djúp í dag. Býðst gestum þá að skoða minjastaðinn og fræðast um þær fornleifarannsóknir sem nú fara þar fram og njóta leiðsögn fornleifafræðinga.

Frá sumrinu 2003 hafa farið fram fornleifarannsóknir í Vatnsfirði, bæði uppgröftur og fornleifaskráning. Rannsóknirnar hafa leitt í ljós mannvistarleifar allt frá 10.öld til okkar daga á tveimur meginsvæðum í túninu.

Skáli frá víkingatímanum hefur verið grafinn upp, auk smiðju og annarra smáhýsa.

Á bæjarhólnum er hins vegar hafin rannsókn á yngstu minjum staðarins.

Rannsóknir þessar gefa einstakt tækifæri til að sjá elstu og yngstu mannvistarleifar býlis, annars vegar frá 10.öld og hins vegar frá þeirri 20. Fornleifarnar gefa vísbendingu um líf fyrri tíma: húsakost, mataræði, búskaparlag og klæðnað.

Síðan árið 2005 hefur verið rekinn fornleifaskóli í Vatnsfirði og er hann starfræktur samhliða uppgreftri í júlímánuði. Í skólann koma nemendur að víðsvegar úr heiminum og læra uppgraftartækni undir leiðsögn íslenskra og erlendra sérfræðinga.

Spáin fyrir Vestfirði í dag er hin ágætasta: Léttskýjað að mestu, smá suðaustan gola og hiti 13- 18 stig. Aðgangur að uppgreftrarsvæðinu er ókeypis.