Frá slysstað á Holtavörðuheiði. mbl.is/Ómar Bragi

Lögreglan í Borgarnesi segir, að ekki leiki grunur á að ökumaður jeppa, sem valt á Holtavörðuheiði á föstudagskvöld, hafi verið undir áhrifum áfengis. Að sögn lögreglu eru alltaf teknar blóðprufur til þess að kanna ástand ökumanna eftir slys en ekkert hafi bent til þess að maðurinn hafi verið ölvaður.

Tveir farþegar jeppans voru fluttir með þyrlu Landhelgisgæslunnar á gjörgæsludeild Landspítala Í Fossvogi og er einn þeirra enn í öndunarvél á gjörgæsludeild.  Ökumaður hefur fluttur á almenna deild og annar farþegi bílsins er útskrifaður.

Fram kom í fjölmiðlum á föstudagskvöld, þar á meðal á mbl.is, að grunur léki á að ölvun hafi komið við sögu. Lögreglan í Borgarnesi segist ekki kunna skýringar á því hvaðan þær upplýsingar komu en segist ekki vita til að þær hafi komið frá lögreglu. Það skal hins vegar tekið fram, að blaðamaður mbl.is, sem skrifaði fréttina, hafði upplýsingar sínar þaðan.

Að sögn lögreglu er starfsregla að blóðprufur séu alltaf teknar í aðstæðum sem þessum, til þess að kanna ástand ökumanna eða einhvers sem gæti hafa haft áhrif á slys og til þess að útiloka möguleika á ölvun.  Ökumaður jeppans hafi verið meðvitundarlaus eða ekki viðræðuhæfur eftir slysið.   

Jeppinn valt á Holtavörðuheiði, skammt frá eyðibýlinu Fornahvammi í Norðurárdal, á föstudagskvöld.