mbl.is/Rax

Mikil hlýindi hafa gert landsmenn káta undanfarið og er útlit fyrir að þau muni haldast eitthvað áfram. Verðurspáin fyrir verslunarmannahelgina lítur vel út.

Sigrún Karlsdóttir á Veðurstofu Íslands sagði ástæðu þessa suðræna hita vera þá að nú væri víðáttumikil lægð fyrir sunnan landið sem teygði sig óvenju hátt upp í veðrahvolfið. Þarna væri því óvanalega hlý tunga sem næði frá Suður Evrópu og norður eftir til okkar.

Lægðin sendi öðru hvoru frá sér rakara loft og þaðan væri skýringin á vætunni sem sums staðar hefur verið.

Sigrún sagði að víða yrði bjart á morgun en þó yrðu þokubakkar norðaustan- og austanlands, við ströndina. Næstu dagar litu vel út og allt útlit fyrir áframhaldandi hlýindi.

Veðurstofan sendi í dag frá sér bráðabirgðaspá fyrir verslunarmannahelgina og verður hún endurskoðuð frá degi til dags.

Svona lítur þá helgarspáin út:

Lægðasvæði verður suður- og suðaustur af landinu og því verður austan- og norðaustanátt ríkjandi. Búast má við strekkingsvindi á föstudaginn og dálítilli rigningu um landið austanvert og með suðurströndinni en að annars staðar verði skýjað að mestu og þurrt.

Á laugardag og fram á mánudag er útlit fyrir fremur hægan vind og bjartviðri um mestallt land, en þó má gera ráð fyrir að þokubakkar verði við norðaustur- og austurströndina.

Hlýtt verður í veðri, hiti um 13-22 stig, og líkur eru á að hlýjast verði vestantil á landinu