Ellert B. Schram.

Ellert B. Schram, þingmaður Samfylkingarinnar, segir að miklar breytingar á aðstæðum frá í fyrra, þýði öðrum þræði að stjórnarsáttmáli frá í maí í fyrra hafi litla sem enga þýðingu. Hann vill endurskoða stjórnarsáttmálann.

Ekki er hefð fyrir því að smíða nýjan stjórnarsáttmála á miðju kjörtímabili. Ellert B. Schram leggur þetta til í grein í Morgunblaðinu í gær.

Hugmyndin fær lítinn hljómgrunn stjórnarþingmanna sem kannast ekki við að hún hafi verið rædd. Ellert segir að þegar ríkisstjórnarsáttmálinn var gerður hafi verið þensla og mönnum helst í hug að draga úr framkvæmdum í byggingariðnaði og/eða stórvirkjunum. Engum hafi heldur dottið í hug að skipta krónunni út fyrir evru. Nú hafa aðstæður breyst svo mikið að ekki eigi að binda sig við úr sér gengnar ályktanir flokka eða landsfunda. „Skoðum stjórnarsáttmálann upp á nýtt og gerum það sem gera þarf við gjörbreyttar aðstæður, til þess eru stjórnmálin að hugsa upp á nýtt.“

Ágúst Ólafur Ágústsson, varaformaður Samfylkingarinnar, telur ekki þörf á því að taka upp stjórnarsáttmálann. „Ég tók þátt í gerð stjórnarsáttmálans á Þingvöllum og hann heldur, sem formlegur farvegur um ákveðinn grundvöll, en nálgun má breyta. Flokkarnir samræma sín sjónarmið og þurfa ekki heilan stjórnarsáttmála til þess. Auðvitað vil ég nýja nálgun í Evrópumálum, en ekkert í stjórnarsáttmálanum stöðvar það. Ekkert útilokar heldur nýja nálgun í umhverfismálum í hvora áttina sem er.“

Ásta Möller, þingmaður Sjálfstæðisflokks, sér enga þörf á að breyta stjórnarsáttmálanum. Ekkert orðalag kallar á nýjan sáttmála. Evrópusambandsaðild er ekki á dagskrá og mikil umræða um evrumál hefur engu skilað enn þá. Sjálfstæðisflokkurinn er ekki tilbúinn og frá virkjanasjónarmiðum er ekkert í sáttmálanum sem stangast á við þau áform sem uppi eru.

Frekar að kjósa upp á nýtt

„Það hljóta að vera nokkrar fréttir fyrir kjósendur. Menn verða að sýna rétt spil og ráði ríkisstjórnin ekki við ástandið án þess að rífa upp með rótum öll fyrirheit sem gefin voru og skipta um grunnafstöðu hlýtur að þurfa að kjósa,“ segir Ögmundur.