Bifreiðum sem ekið er með eftirvagna, s.s. fellhýsi og hjólhýsi, án þess að réttur útbúnaður sé viðhafður verður kippt úr umferðinni og þær kyrrsettar þar til úrbætur hafa verið gerðar, að sögn Guðbrands Sigurðssonar, aðalvarðstjóra hjá umferðardeild lögreglu höfuðborgarsvæðisins.

Hann segir notkun á framlengdum hliðarspeglum mjög ábótavant en einnig sé nokkuð um að menn dragi stór hjólhýsi á of litlum bílum. Lögreglan verður með sérstakt umferðareftirlit fyrir og um verslunarmannahelgina, þá sérstaklega á Suðurlandsvegi og Vesturlandsvegi, og er ætlunin að fylgja ökumönnum út úr höfuðborginni.

Auk þess að fylgjast með útbúnaði verður að venju fylgst með ástandi ökumanna og ökuhraða. Þyrla Landhelgisgæslunnar verður einnig notuð um helgina og nýtt hvar sem umferðin er mest.