Eftir Andrés Þorleifsson andresth@mbl.is

Allur þjóðvegur 1, hringvegurinn, er nú kominn í gsm-samband eftir að Síminn kveikti á nýjum sendi á Krókhálsi í Norðurárdal. Þar með lauk þeim áfanga í framkvæmd fjarskiptaáætlunar sem Fjarskiptasjóður og Síminn sömdu um í janúar 2007, en með samningnum var Símanum falið að koma á farsímaþjónustu á öllum hringveginum, á fimm fjallvegum og nokkrum ferðamannastöðum.

Næsta hluta áætlunarinnar hreppti hins vegar Vodafone, og á honum að vera lokið um næstu áramót. Þar er gert ráð fyrir að önnur stór svæði komist í gsm-samband, m.a. á Vestfjörðum, Norðausturlandi og Snæfellsnesi.

Kristján L. Möller samgönguráðherra og Sævar Freyr Þráinsson, forstjóri Símans, voru viðstaddir opnun sendisins. Í ávörpum lögðu báðir áherslu á aukið öryggi vegfarenda með tilkomu símasambandsins.

Hjá Símanum stendur nú til að setja upp langdrægt þriðjukynslóðarkerfi og segir Sævar Freyr Ísland vera með fyrstu löndunum þar sem slíkt kerfi er sett upp. „Við náum með þessu að dekka allt landið á næstu tveimur árum eða svo,“ segir Sævar og vonar að með auknu farsímasambandi verði bylting í gagnaflutningum fyrir alla landsmenn.

Spurður um hvað stjórnvöld hyggist gera næst til að bæta fjarskipti á landsbyggðinni bendir Kristján m.a. á háhraðaútboð Fjarskiptasjóðs, sem snúist um að koma á háhraðanettengingu fyrir a.m.k. 1.200 sveitabæi, en sú tala hefur reyndar minnkað nokkuð.