„Þetta er ekki óraunhæft, öllum tæknilegum brögðum er beitt í þessum efnum, til þess að fá fólk til að bíta á agnið," segir Ómar Smári Ármannsson, aðstoðaryfirlögregluþjónn, en svonefnd Nígeríubréf eru farin að berast í SMS formi.  

„Þetta er í takt við tækniþróunina, fyrst voru send bréf, svo tölvupóstar, og ekki ólíklegt að SMS skilaboð séu liður í þeirri þróun."

Lesanda mbl.is barst SMS skilaboð um að látinn viðskiptavinur sendanda, sem hafi sama eftirnafn og viðtakandi SMS-ins hafi látið eftir sig 17,5 milljónir dollara sem enginn hefur krafist.  Nánari upplýsingar séu gefnar í ákveðnu símanúmeri eða með tölvupósti.

Ómar Smári segist ekki hafa heyrt sérstaklega um að ný tegund af Nígeríusvindli sé hafin með SMS sendingum en finnst það ekki ólíklegt.

„Það er sjálfsagt að benda fólki á að varast þetta, það er alltaf einhver sem bítur á agnið," segir Ómar og bætir við að besta ráðið fyrir þá sem fá slíkt SMS skilaboð eða tölvupóst sé að ýta strax á eyða takkann.

Ómar segir að erfitt og tímafrekt sé að rekja tölvupóstssvindl og það sama gildi fyrir SMS svindl.  SMS skilaboðin eru líklega send úr tölvu í síma, sem geri það auðveldara að fela sendanda.