Vilja breytingar á meirihlutasamstarfinu

Sjálfstæðismenn vilja sjá ákveðnar breytingar á meirihlutasamstarfinu í borgarstjórn, samkvæmt heimildum Morgunblaðsins. Hreyfing er í þá átt að taka upp samstarf við Framsóknarflokkinn og styrkja mögulega meirihlutasamstarfið með því. Einnig hefur verið þrýstingur á það að Sjálfstæðisflokkurinn fái borgarstjórastólinn fyrr en samið hafði verið um.

Framsóknarmenn útiloka ekki samstarf við Sjálfstæðisflokkinn, enda felst í því tækifæri fyrir flokkinn að komast aftur til áhrifa, en ólíklegt má telja að framsóknarmenn vilji fara í samstarf við Frjálslynda og verða þriðji flokkurinn í meirihlutasamstarfinu.

Undirliggjandi þreytu og óþolinmæði hefur gætt meðal sjálfstæðismanna um nokkurt skeið og ekki hafa skoðanakannanir bætt úr skák. Þær raddir heyrast að erfiðir tímar séu í efnahags- og atvinnumálum þjóðarinnar. Því sé ábyrgðarhluti að renna ekki stoðum undir samstarfið þannig að meirihlutinn verði vandanum vaxinn.

Þá er óánægja meðal sjálfstæðismanna með það hvernig umræða hefur þróast um skipulags- og samgöngumál, m.a. vegna Listaháskólans og vegna Bitruvirkjunar. Ólafur F. Magnússon hefur sagt að virkjunin hafi verið slegin af, en það stangast á við orð Kjartans Magnússonar, borgarfulltrúa og stjórnarformanns OR.

„Það eru allir að springa“

Sjálfstæðismönnum þykir Frjálslyndir fullaðsópsmiklir í meirihlutasamstarfinu miðað við fylgi þeirra í síðustu borgarstjórnarkosningum. „Það eru allir að springa,“ sagði einn úr landsmálunum í gær.

Ljóst er að þessi umræða er ekki alveg ný af nálinni innan borgarstjórnarflokksins, því ekki voru allir borgarfulltrúar sáttir við myndun meirihlutans á Kjarvalsstöðum á sínum tíma. Haft er á orði að nýr kapítuli þurfi að hefjast með nýjum oddvita, Hönnu Birnu Kristjánsdóttur, og til þess þurfi að rífa meirihlutasamstarfið upp úr þeim farvegi sem það er í.