Esjan í kvöld. mbl.is/Ómar Smári

„Það liggur ágætlega á honum, hann er ekki orðinn mjög kaldur ennþá," segir Dagbjartur Brynjarsson, úr svæðisstjórn Björgunarsveita Slysavarnafélagsins Landsbjargar.  Karlmaðurinn, sem var á göngu í fjallinu, og lenti í þoku, hefur verið í villu síðan um klukkan 17:30 í dag, og er hans nú leitað. 

„Það eru komnir um 30-40 manns upp í fjallið, þau fara allar líklegustu leiðir sem hann gæti verið á, en hann er uppi á sléttum Esjunnar," segir Dagbjartur.

Maðurinn óskaði eftir hjálp um átta leytið í kvöld, eftir að hafa villst á leið vegna þoku.

„Hann gerir alveg hárrétt, kemur sér fyrir í góðu skjóli, og er ekki á miklum þvælingi sem gerir okkar vinnu mun auðveldari," segir Dagbjartur.  „Við erum í símasambandi við hann með reglulegu millibili, á meðan hann heldur sér í góðu skjóli ætti þetta að ganga vel fyrir sig."

Að sögn Dagbjarts er ekki mikið rok uppi á Esjunni en skyggni er mjög lítið eða um 30 metrar.   Allt kapp er lagt á að finna manninn fyrir myrkur enda kalt í þessari hæð þegar nóttin skellur á.