Ólafur Ragnar Grímsson óskar Guðmundi Guðmundssyni þjálfara íslenska landsliðsins, til hamingju með sigurinn mbl.is/Brynjar Gauti

Forseti Íslands, Ólafur Ragnar Grímsson, og Dorrit Moussaieff komu í nótt að íslenskum tíma til Peking til að vera viðstödd lokadaga og lokaathöfn Ólympíuleikanna.

Forsetahjónin horfðu á sigurleik íslenska handboltaliðsins gegn Pólverjum í morgun og munu fylgjast með öðrum leikjum í handbolta og ýmsum öðrum keppnisgreinum, heimsækja Ólympíuþorpið og hitta alla íslensku þátttakendurna, samkvæmt tilkynningu frá forsetaembættinu.

Íþrótta- og Ólympíusamband Íslands bauð forseta Íslands að koma á leikana. Forseti er verndari sambandsins og mun taka þátt í ýmsum atburðum á vegum Íþrótta- og Ólympíusambandsins meðan á dvölinni í Beijing stendur.

Mun eiga fund með forseta Kína á föstudag

Forseti Kína Hu Jintao hefur óskað eftir að eiga fund með  Ólafi Ragnari  og mun fundur forsetanna verða á föstudagsmorgun að kínverskum tíma.

Frá Kína fer forseti Íslands á alþjóðlega ráðstefnu í Bangladesh um loftslagsbreytingar og fæðuöryggi.

Margar þjóðir í Asíu óttast nú afleiðingarnar af þeirri hækkun sjávarborðs sem bráðnun jökla og íss á norðurslóðum – á Grænlandi, Norðurskautinu og Íslandi – mun hafa í för með sér ef ekki tekst að koma í veg fyrir alvarlegar loftslagsbreytingar, að því er segir í tilkynningu.