Útreikningar kúabænda standast

Landssamband kúabænda segir það athyglisvert að fylgjast með viðbrögðum olíufélaganna vegna útreikninga sem sýni auknar álögur félaganna á litaða dísilolíu.

 Á vef Landssambands kúabænda segir að í hádegisfréttum RUV í gær viðurkenni Már Erlingsson, fjármálastjóri Skeljungs að álagningin hefði hækkað þar á bæ að undanförnu.

Viðbrögð Elíasar Bjarna Guðmundssonar, framkvæmdastjóra fjármálasviðs N1, í 24stundum í dag séu hins vegar öllu lakari.

Hann segir útreikningana fráleita og uppfulla af staðreyndavillum. Að auki sé „bara verið að skoða heimsmarkaðsverð á olíu og gengi krónunnar“.

Þessi ummæli gefi talsvert tilefni til að ætla að Elías hafi ekki einu sinni haft fyrir því að kynna sér málið. Þau séu því í besta falli fljótfærnisleg tilraun til að slá ryki í augu lesenda. 

Útreikningar Landssambandsins byggja á gögnum frá Hagstofu Íslands um innkaupsverð á dísilolíu, vörugjald til hafnar og útsöluverð á litaðri dieselolíu. Allt í íslenskum krónum.

Álagning olíufélaganna, til að mæta rekstrarkostnaði og skapa hluthöfum þeirra arð, er útsöluverð  að frádregnu vörugjaldi og innkaupsverði. 

Þá segir að það sé engum blöðum um það að fletta að þessi álagning hafi hækkað um nærri fjórðung að undanförnu og fyrir þeirri hækkun sé harla lítil innistæða.

Landssambandið segir að engar fullyrðingar hafi verið settar fram um hagnað þessara félaga, enda er það önnur deild.

Í útreikningunum séu engar „staðreyndavillur“ enda byggi gögn Hagstofunnar á innflutningsskýrslum olíufélaganna sjálfra.

Þegar forsvarsmenn félaganna viðurkenni loks að álagningin hafi hækkað, sé þeim tíðrætt um aukinn fjármagnskostnað, vegna dýrara birgðahalds.

Fyrst að menn vilji ræða einstaka kostnaðarliði, þá sé ágætt að taka dæmi.

Forsendur þess eru þær að olía sé að jafnaði geymd í einn mánuð áður en hún er seld og að fjármagnskostnaður taki mið af stýrivöxtum Seðlabanka Íslands á hverjum tíma. Skjal með útreikningum er að finna hér.

Tímabil: Júlí 2007.

Innkaupsverð (CIF) auk vörugjalds, pr. 1.000 ltr: 33.696

Stýrivextir SÍ: kr 13,3%

Fjármagnskostnaður vegna birgðahalds, kr/ltr:  0,35 kr

og:

Tímabil: Júní 2008

Innkaupsverð (CIF) auk vörugjalds: 79.620 kr

Stýrivextir: 15,5%

Fjármagnskostnaður : 0,96 kr

Mismunur: 0,61 kr 

Af þessu megi dæma að kostnaður við birgðahald sé sáralítill og hafi aukist um ca. 60 aura/ltr.

Að ætla sér að skýra aukningu álagningar upp á milli fimm og sex kr á lítra með honum sé með öllu fráleitt.

Vefur Landssambands kúabænda

• Blogga um frétt