Börn að leik í frístundaheimili mbl.is/Árni Sæberg

Helmingi fleiri starfsmenn hafa verið ráðnir til starfa á frístundaheimilum Reykjavíkurborgar en á sama tíma árið 2007, eða 160 samanborið við 80 í fyrra. Að sögn Kjartans Magnússonar, formanns íþrótta- og tómstundaráðs Reykjavíkur (ÍTR), vantar þó enn allt að 200 manns til viðbótar.

Umsóknum um vistun hefur einnig fjölgað lítillega milli ára en þær eru rúmlega 2.800 en voru 2.744. Frístundaheimili borgarinnar eru tæplega 40 talsins en í gær lágu ekki fyrir nákvæmar tölur um fjölda barna á biðlista eftir plássi.

Spurður hvernig standi á þessari fjölgun starfsmanna segir Kjartan að í sumar var komið á heilsársfrístund sem gaf ÍTR kost á að fastráða starfsmenn. Áður þurfti að segja starfsfólki upp á vorin og ráða á haustin.

Hvað hinsvegar varði þann mikla fjölda starfsmanna sem enn vanti á frístundaheimilin segir Kjartan reynslu ÍTR gegnum árin vera þá að margir starfskraftar séu ráðnir á síðustu dögunum.